Lehen mailak irauten duen 6 egunetan, ohatilan (postura supinoa eta pronoa) saio oso bat egiteko oinarrizko protokoloa ikasten da. Halaber ikasten dira Mentastics izeneko autozainketarako hainbat mugimendu, norberak egunerokoan praktika ditzakeenak. Eduki etikoak ere azaltzen dira, baita maila honi dagozkion hainbat alderdi praktiko ere.

Bigarren mailako 6 egunetan, aurreko mailan ikasitako ohatilako mugimenduen protokoloa findu eta sakontzen da. Metodoa aplikatzeko hainbat eremuren berri ematen da eta Mentastics mugimeduak beste pertsona batzuekin partekatzeko moduan sakontzen da. Eduki etikoak ere azaltzen dira, baita maila honi dagozkion hainbat alderdi praktiko ere.

Hirugarren mailako 5 egunetan, aurreko mailetan ikasitako ohatilako mugimenduen protokoloa errepasatu, findu eta sakontzen da. Metodoaren beste aplikazio berezi batzuk ere erakusten dira. Trager Metodoaren praktika profesionala garatzeko ikasbidean, etika profesionalari buruzko edukiak ere lantzen dira, jendaurreko aurkezpenak, promozioa eta abar.

Mentasticsen 3 egunetan, ohatilarik gabeko lanketa egiten da, norberaren autozainketa mugimenduetan sakontzeko, beste pertsona bati proposatzeko eta taldeko eskola bat lideratzeko. Ikastaro hau mailen artean egin daiteke edota Prestakuntzaren hasiera izan.

Anatomia eta Trager ikastaroko 6 egunetan konbinatzen dira, batetik, Anatomia eta Fisiologiako edukiak ikastea, eta, bestetik, Trager mugimenduen helburu-norabideak ulertzeko ohatilako praktikak. Ikastaroa hiru eguneko bi zatitan banatzen da: Anatomia I (supinoa) eta Anatomia II (pronoa), noiznahi egin daitezkeenak I Maila amaitu ondoren.

 Ikastaro hau ez da beharrezkoa, baina egitea gomendatzen da, honako titulazioren bat izanez gero: erizaintza, fisioterapia, osteopatia, kiropraxia edo medikuntza, edota 500 orduko masaje programaren bat egin baldin bada.